كلمة "أمي" كفاية عليّا

مهما تكون أحلامي كتيرة ...مهما تكون دنيايا كبيرة

لـو لفِّيت العـالم كـله ...كلمة "أمي" كفاية عليّا

دا انت يا أمي لحمي ودمي
أجمل كلمة نطقها لساني
يااللي حنانك طول أيامك
نَوَّر ليلي وشال أحزاني

لما أكون وحداني بعـيد... لما لهيب الغـربة يزيد

مـين هيفكر يحمل همي ...مين بحنانه يخفف عني

دا انت يا أمي لحمي ودمي
أجمل كلمة نطقها لساني
يااللي حنانك طول أيامك
نَوَّر ليلي وشال أحزاني

صـبح وليل أيام وليالي ...دايما صورتك عايشة في بالي

باحلم أرجع تاني صغير ...وف حضنك أفرح من تاني

في يـوم العـيد..

في يـوم العـيد..

وكفك للسما عالي

بتدعيلي..

وانت بعيد

أخطي الصعب

واتغلب على الأحزان

واعدي بخطوتي لقدام

وتتمني..

تشوفي الفرحة في عيوني

كمان وكمان

*****

صحيح الدنيا واخداني

وحاسس إني وحداني

لكن حبك مكفيني

ومهما خطوتي سارت

ومهما غربتي طالت

ومهما الدنيا تبعدني

وتسرق فرحتي مني

مسير الحي يتلاقى

وأرجع تاني م الأول

أدقق الباب

ونتلاقي ونتصافي

ويملا الفرح أيامنا

ونبقى أحباب

*****

هالف ألف وأجيلك

..أناديلك..

ينور ليلي قنديلك

واشكيلك..

وأستنى أشوف تاني

حنان الدنيا في عيونك

ولما أدوب في أحضانك

يهون الهم والدنيا

وانام من تاني مطمن

وحاسس إني من الأول

رجعت لدنيتي الحلوة

..ويوم العيد

أيمن جمال الدين

باحبك كل يوم أكتر

يا أجمل كلمة في الدنيا
يا ست الكل يا أمي
يا وردة فـ قلب بستاني
يا ساكنة فـ روحي وفـ دمي
أنا من قلبي بادعيلك
في كل دقيقة تتهني

*****
في عز الشمس يا أمي
رموشك ضلة تحميني
ولما البرد يهزمني
في أحضانك تدفيني
ونظرة حب في عنيكي
ولمسة ود تكفيني

****
أنا يا أمي مش ناسي
شديد القلب أو قاسي
صحيح الدنيا وخداني
وشارب مر من كاسي
لكن صورتك ما فارقتني
وحبك عالضفاف راسي

****
ومهما ألف أو أكبر
باحن لقلبك الأخضر
وقد الدنيا أو أكتر
باحبك إنت يا سكر
باحبك كل يوم أكتر

أيمن جمال الدين

يا رب

أدعو يا رب الأكوان
أن تملأ بالحب كياني
حب يشمل أمي وأبي
ويفيض على أختي وأخي
*****
دين الحب نعمة ربي
يصلح هذا الكون يربي
روح السنة والقرآن
حب الخير والإحسان
*****
حين يكون الكل صديقي
وأزين بالحب طريقي
تغدو الدنيا ما أحلاها
مثل الوردة فاح شذاها

افرح يا عصفور

َزقزقْ يا عصـفورْ

واملا الكون سُرورْ

واتمخـطر وِغَـنِّي

قُـدَّام الطُـيـورْ

*****

اوعى فِـ يوم تِتْشاقَى

وِتنحكش فِـ العِشِْ

واسـمعْ كِلِْمِة مَامَا

لمَّا تقول لك "هِشْ"

*****

افتحْ بُقـَّكْ يَاللَّا

ناكُـل "هَمْ" "هَمْ"

بُكرة عقلك يِكْبَرْ

تِحفظ اسمك صَمْ

*****

العَصـفور الشَّـاطِر

ياكُل حَـب كِتـيرْ

علشان رِيشُه يِزَهْزَهْ

وِيرَفْرَفْ وِيطـيرْ



أيمن جمال الدين